Plantun de Prouvènço

Pèr coumpara dos planto d'encò nostre

Erophila verna & Scleranthus annuus

Erophila verna

Brassicaceae Cruciferae

Noms en français : Drave printanière, Drave du printemps.

Descripcioun :
Pichoto planto menudo que fai pèr lou mai 10 cm d'auturo. Sèmblo un Cerastium emé si petalo escavado sus la mita. Pamens a bèn 4 petalo e 2 + 4 estamino. Li flour fan quàuqui mm, pas toujour bèn duberto. La cambo de flour sort d'uno pichoto rouseto basalo. Flouris d'ouro au mitan de l'ivèr, d'aqui que vèn soun noum.

Usanço :
Servié à passa tèms pèr sougna li panàri. Li fueio podon èstre mesclado is ensalado, mai faudra vous leva d'ouro.

Port : Erbo
Taio : 3 à 15 (20) cm
Fueio : basalo
Tipe bioulougico : Teroufite
Cicle bioulougico : Planto de l'an

Gènre : Erophila
Famiho : Brassicaceae
Famiho classico : Cruciferae

Coulour de la flour : Blanco
Petalo : 4
Ø (o loungour) flour : Pancaro entresigna
Flourido : Ivèr

Sòu : Ca
Autour basso e auto : Pancaro entresigna
Aparado : Noun

Liò : Champ - Paret - Roucas
Estànci : Termoumediterran à Mountagnard
Couroulougi : Pancaro entresigna
Ref. sc. : Erophila verna (L.) Chevall., 1827

Gnavello(-de-l'an)

Scleranthus annuus

Caryophyllaceae

Nom en français : Gnavelle annuelle.

Descripcioun :
Aquelo planto, proun ramificado, se tirasso sus la sablo e lis endré trepeja. Sus si tijo se podon vèire uno à dos bando de péu crespu. Li fueio soun redo e en long. Li flour, verdo, soun pas bèn grosso e fan d'enflourejado agroumelado. La subsp. presentado eici, emé de flour gaire duberto e que trachis dins li mitan primàri, ié dison polycarpos. Coumpara emé la gnavello-renadivo.

Usanço :
Fai partido dóu group (38 meno) de flour dicho "de Bach". Ramenten que lou mege, Dr Edward Bach (1886-1936), adoubè de poutingo de flour que dèvon "armounisa l'equilibre epsichique de la persouno". La gnavello permetrié de prendre de decisioun. En Poulougno, au siècle passa s'acampavo li babo de vermèu (Coccus Polonicus) que reston sus li racino pèr n'en faire un coulourant rouge.